How to shop from Amazon | كيف أشتري من أمازون

♥ السلام عليكم و رحمة الله و بركاته ♥

كيف حالكم ؟! 

اليوم حأكتب عن الطلب عن طريق الإنترنت !

يلا نبدأ !!

طيب ، أول شيء مو أنا الي أطلب طبعًا ، أخويا الكبير يطلبلي و هو يتكفل بكل الإجراءات !!

فالخلفية الي عندي عن هادا الموضوع جداً ضعيفة للأسف ، لكن في كم بنت طلبوا مني أني أوضح كم شيء ..

يمكن أقدر أفيدكم في مدة التوصيل و الأسعار و أسعار الشحن و كده ،  نشوف إيش يطلع معايا :P 

أوكي ، بالنسبة للطلب ، أنا أطلب من موقع أمازون ( أخويا يرفض يتعامل مع أي موقع آخر مثل Ebay بسبب الأمان و كده )

فالموقع الي أتعامل معاه هو Amazon و ما شفت منو أي خطأ حتى الآن أو تعامل سيء !

تاني شيء شركة الشحن هي أرامكس Aramex و الشركة جداً حلو شحنها و برضو ما شفنا منها أي تعامل سيء ..

أوكي فكيف أنا أطلب ؟! ♥

أول شيء أدخل على أمازون و أعمل search على المنتجات الي أبغاها ، في بعض الأحيان تلقي تخفيض ( إيوه تخفيض مع إن أسعارهم قيدها رخيصة ) ، يعني خلينا ناخد على سبيل المثال فرش Real Techniques " Core Collection " o أوكي ؟!

سعرها الأصلي 18 $ ، لقيتها مخفضة بسعر 14 $ > و حاليًا عليها تخفيض بسعر 15.49 $ !

شايفين كيف ؟ الموضوع جداً جميل ، لازم تكوني ذكية و لو لحقتيلك كم منتج في نفس الوقت عليهم تخفيض تكوني كسبتي كم دولار في جيبك !

أوكي ، نكمل ؟!

مثلاً أخترت فرش ريل تكنيك خلاص هي الي أبغى أشتريها ، إيش أسوي دحين ؟! 

أجيب الآلة الحاسبة و أضرب قيمتها في 3.75 و الناتج الي حيطلع معاكي هو سعر الفرشة بالريال السعودي !

* دروس رياضيات -_- *

فهادا حيفيدك أنك تعرفي كم بتدفعي فيها صافي القيمة بدون قيمة الشحن لسه ، أوكي نكمل ، دحين حسبت قيمتها أوكي أروح أضيفها للكارت أو العربية :) احم ..

بعدين لو خلاص ما أبغى شيء تاني أروح أضغط على علامة العربية Shopping Cart و أدفع ..

طبعًا .. أولاً لازم يكون عندك :- 

1- فيزا 

2- بريد أمريكي في أمريكا 

3 - حساب في أرامكس 

أنا طبعًا ما عندي خلفية عن دي الأشياء زي ما قلتلكم لأن مو بطاقتي ولا أنا الي أدفع ولا أنا الي أسوي شيء ..

فلازم يكون معاكي شخص عندو خبرة بالأشياء المالية و البطايق و كده ، و أنصح إنك تقرئي كمان في النت أكثر من موضوع عشان تفهمي الشغلة ، أوكي أنا لقيت موضوع من منتدى DSL Gate بس  برضو أنصح إنك إنتي تدوري بنفسك و تحوسي إلين تفهمي الموضوع تمام ! 

لأن العملية مو مره بسيطة شويه معقدة و يبغالها فهم قبل ما تسوي أي شيء !

و هادا الموضوع الي لقيتو 

كيف تشتري من Amazon

ننتقل لموضوعنا التاني ، الشحن ..

أنا أستخدم شركة أرامكس زي ما قلت و نظامهم كالتالي : 

65 ريال لأول كيلو 

يعني لو أشيائك أقل من كيلو إلى كيلو واحد بالزبط ! حياخدو منك 65 ريال عند الإستلام !

أما لو أشيائك أكتر من كيلو ( راح ياخدو منك 35 ريال زيادة على كل كيلو يزيد عن الكيلو الأول ! )

فهمتو ؟ :"( 

مثلاً : أشيائي 2 كيلو و نص !

يلا نحسب : أول كيلو = 65

تاني كيلو = 35

تالت كيلو = 35

زي كده  ! و ما أعرف إذا غيرو طريقتهم أو لا :)

* و ترا أنا أفشل شيء في الرياضيات على وجه الأرض يعني ما أحب حتى أجمع و أطرح :") *

و بالنسبة للوقت الي تاخدو الأشياء عبال ما توصل : تقريبًا من 4 - 7 أيام بالزبط !

لأن ممكن تتعرض للجمارك و تتأخر أو تتأخر الشحنة في الوصول لأي سبب آخر .. 

و بس هادا الي عندي في جيبي و الباقي ما أعرف عنو شيء و الله أتمنيت إني أقدر أفيدكم في أشياء تانيه كمان بس الظاهر إني ما عندي خلفية كبيرة عن الموضوع ، أتمنى في المستقبل إني أعتمد على نفسي و أشتري بنفسي إن شاء الله :) ♥

و لو عندكم أي استفسارات عن حاجة أنا تكلمت فيها إني فاهمتها أتركوها تعليقات و حيسعدني إني أجاوبكم ♥♥

و أبغى منكم إقتراحات عن التدوينات الجايه ، إيش حابين تشوفو ؟ إيش حابين تعرفو ؟!

شكراً لكم ♥