بسم الله الرحمن الرحيم
♥♥♥♥♥♥♥♥♥♥♥
السلام عليكم و رحمة الله و بركاته !
كيف حالكم بنات ؟
اليوم راح أكتب عن مستحضرات المكياج الأساسية الي ممكن تحتاجها الطالبة الجامعية من دون مبالغة !
* محد يبغى يروح الجامعة كأنو رايح فرح ، صح ؟ *
كلنا نشوف البنات الله يهديهم الي في الجامعة علبة ألوان في وجههم و أبداً المنظر مره مو حلو تشويه بدال تجميل !
أنا عارفه إنو مو أنا الوحيدة الي بأسوي زي التدوينة دي ، لكن مهم مهم مهم ننشر الوعي إنو الجمال مو بكثر المستحضرات على وجهك أو الألوان ، غرض المكياج هو إظهار جمال تقاسيم وجهك الي تملكيها و ربنا خلقك فيها و ليس إخفائها بالألوان -_- !
فمهما كترت المواضيع لمكياج الجامعات ما عندكم مشكلة بالعكس يمكن توصل لأكبر كمية ممكنة من البنات و تساعدهم و يا سلام لنا الأجر إن شاء الله :) !
أوكي ، تكلمت كتير .. نبدأ ؟!
♥أولاً : ممهد للمكياج :♥
حتقولولي إيش ممهد للمكياج أو Base/Primer و انا رايحه جامعة ؟!!! إيييوه لازم بس مو أي برايمر أو بيس ..
بيس بمعنى طبقة قبل المكياج الي بتحطيه على وجهك مو شرط يكون برايمر !!
بالنسبة للبيس الي أنا أنصح فيه بنات الجامعة هو ( واقــــي الشـــمـــس ) !!!!
لازم لازم لازم لازم لازم لازم !! في واقي شمس لكل نوع بشرة و ان شاء الله حتلاقي الي حيعجبك بس لا تقولي مو لازم !
و بالنسبة ليا واقي الشمس الي استخدمو هو
♥DiorSnow white reveal SPF 50 من ديور ..♥
ينفع للبشرة الدهنية و المختلطة ، الجافة تبتعد عنه لأنه يجفف نوعًا ما ..
السعر : 250 ريال سعودي
موجود في وجوه أو سيفورا أو باريس غاليري أو أي محل عندو كاونتر ديور ..!
بالنسبة للبنات الي بشرتهم دهنية و جامعتهم مافيها تعرض للشمس ، بالعربي فيها سقف يعني -_- مو زينا ..
ممكن يستخدمو بيس يساعدهم إنهم يحافظو على مكياجهم و محا يزيت وجهها طول اليوم تفضل تحط باودر !
و أنا لقيت هادا المنتج من بايوديرما ممتاز جداً كعلاج و في نفس الوقت ممهد للمكياج !
♥Bioderma Sebium Pore Refiner♥
يخفي المسامات ( بدون ما يسدها ) و يخفف الإحمرار و يعمل طبقة على بشرتك بمواد طبية آمنة عشان ما يزيت وجهك طول اليوم ..
ينفع للبشرات الدهنية و المختلطة ، الجافة و الدهنية جداً ما حا ينفعلهم !
كتير ناس قالو انه يشبه البورفيشنال من بينيفت و أنا ما أشوف الشبه ..
البورفيشنال أثقل و يغطي المسامات أكتر..
السعر : 126 ريال سعودي
موجود في بوتس أو الصيدليات الكبرى مثل النهدي و دان و السديس و صيدلية نورا ..
* بالنسبة لحكاية انه مافيه حماية من الشمس مو مشكلة إذا ما كنتي تتعرضي للشمس طول اليوم في جامعتك يعني بس من السيارة للباب تتعرضي لها و كده ، تقدري تعوضي حماية الشمس بالمنتج الجاي *
♥ثانيًا : التغطية أو Coverage :♥
المنتج المثالي الي اخترته و يعطيني التغطية المثالية للجامعة هو منتج متواضع جداً
♥Garnier BB Cream Oily/Combination Skin♥
جميل جميل جميل جميل للبشرات الدهنية و المختلطة ، هادا البي بي كريم الجديد من غارنييه مو نفس القديم ..
فيه حماية من الشمس SPF 20 و هادا شيء كويس للي جامعتها مافيها تعرض للشمس و حتستخدم البيس التاني الي تكلمت عنه !
و برضو كويس للبنات الي حيستخدمو واقي شمس لأنو خفيف جداً و ينشف و ما يدبك و يلصق كده .. ما راح تحسي إنه إضافة منتج على وجهك مو زي الأساس و البهدلة و كيف يسيح أبداً !
تغطيته ميديم .. يعني ما راح يغطي كل شيء في الوجه و هادا الغرض منه !
نبغى الشغل يبان طبيعي ما نبغى مكياج أفراح !!
موجود بلونين الميديم ، و اللايت ..
أنا لوني من ماك NC30 - NC25 و نفع معايا اللايت ..
السعر : 30 ريال
موجود في بوتس ، الدانوب ، الصيدليات الكبرى دان و النهدي و .. إلخ !
♥ثالثُا : تغطية الهالات السوداء Dark Circles Coverage :♥
بالنسبة للمشكلة دي ، أنا تحت عيني مو شيء فظيع مره الحمدلله يعني نص و نص الموضوع ..
فما أحتاج كوركتور و الكلام الي سمعتوه دا .. يكفي معايا كونسيلر ..
والكونسيلر الي اخترته للجامعة عشان ما نبغى على وجهنا نحس ستين طبقة مكياج هو ..
♥Garnier Eye Roll-on Anti-Dark circles♥
أسهل و أخف و أنعم شيء في الحياة ، يعطي تغطية معقولة يعني مو خفيف لدرجة انه مالو داعي !
بالعكس الفينيش حقو Natural Finish يعني ينشف يبان زي جلدك الطبيعي بس أفضل ..
مره أنصح فيه بنات الجامعة و حتى بنات المدرسة الي يعانو من المشكلة دي ..
السعر : 25 ريال سعودي
موجود في بوتس و كل الصيدليات و السوبرماركتس .. احس حتى البقالات جابتو هههههههه
♥رابعًا : لمعة طبيعية على الخد و لون طبيعي للوجه Natural Glow and color :♥
بمعنى الثلاثي الجميل ( البلشر و البرونزر و الهايلايتر ) ! صح ؟
بس أتوقع و أعتقد 100% شكلك حيطلع أحلى بدون هايلايتر عشان جامعة و ما نبغى الموضوع يكون Over !
نبغى نرجع لون لوجهنا بعد ما أستخدمنا البي بي كريم و الكونسيلر !
بلشر الي اخترته هو :
♥MAC Melba Matte Powder Blush♥
اللون جداً طبيعي مشمشي على روزي ..
ليه مات ؟ عشان يبان طبيعي 100% و ما تحتاجي كتير منه يكفي لمسه بسيطة تعطيكي تورد خفيف ..
السعر : 115 ريال سعودي
موجود في ماك طبعًا -_-
أوكي الشيء التاني هو البرونزر :
مره شيء جميل على الوجه بدال الهايلاتر لأنه يعطي لون كده خفيف و صحة للوجه !
البرونزر الي اخترته هو ..
♥MAC Solar Riche Bronzing Powder♥
البرونز هادا فيه شيمر .. ماهو مات .. ليه؟ لأن البلشر مات عشانه في بداية الوجه ما نبغى شيء كتير..
فالبرونزر في حدود الوجه و على طرف عظمة الخد مع الشيمر راح يغنيكي عن الإضائة 100%
السعر : 145 ريال سعودي
قبل سنة إشتريته من ماك ، أكيد أرتفعت الأسعار :\
* ملاحظة : لو تبغي تبدلي البرونز و البلشر بخطوة واحدة *
♥Benefit Cha Cha Tint♥
تنت من بينيفت لونه زي الكورال أورنج مره حلو بدون لمعات ..
يعني للبنات الي يبغو شيء سريع بدون فرش و كده هادا تحطي كم نقطة على خدك و توزعيها
و تحطي على شفايفك منه و توزعيه يطلع مره حلو ..
و ثابت طول اليوم !!
السعر : 165 ريال سعودي
سيفورا و دبنهامز و وجوه ..
♥خامسًا : مكياج العين : Eye Makeup♥
هنا المصيبة الي أشوفها في الجامعة .. البنات مره يشتغلو آي شدو و إضاءة ورموش و حاجات شفتها غريبة عجيبة غير عن العدسات الملونة !!
طيب .. بالنسبة ليا مكياج العين للجامعة = ماسكرا .. :)
عشان لو دخل شيء في عيني في الجامعة أعرف أتصرف ههههههههههه
الماسكرا الي اخترتها هي من احدى مشترياتي من النت حطيت صورتها قبل ..
♥Maybelline Great Lash Lots of Lashes♥
مره رخيصة .. و مره حلوة و مره سودة شغلها تطويل أكتر من التكثيف !
السعر : 15 ريال سعودي
من أمازون أمريكا ، بس موجودة عندنا في بوتس أتوقع بس مو نفس السعر البريء دا أبببداً !
بالنسبة للأيام الي أكون رايقة فيها نوعًا ما و يكون معايا وقت زيادة قدام المرايا أضيف خطوة :
♥Lancome Artliner♥
آي لاينر لانكوم آرت لاينر ..
من أفضل الأي لاينرز الي استخدمتهم قبل كده مره عملي و سريع و فرشته سهلة و ما يسيح !
و ينفع للمبتدئات بصراحة مره سهل و سريع ..
السعر : 170 ريال سعودي
موجود في سيفورا ، وجوه ، دبنهامز ، باريس غاليري .. إلخ
♥سادسًا : لون للشفايف : Lip Color♥
بالنسبة ليا دي أهم خطوة .. هي الي تساعد شكلك يكون مرتب و صاحية و فريش !
اخترت مستحضرين استخدمتهم بكثرة في السنة الي فاتت في الجامعة و ريحوني ..
أول واحد ..
♥Rimmel Kate Moss Lipstick 08♥
الروج من مجموعة كيت موس رقم 8 ..
يرطب و لونه طبيعي ابداً مهو تو متش و حلو على أي لون بشرة ..
و ثابت مع إنه يرطب ..
السعر : 34 ريال سعودي
موجود في بوتس و سنتر بوينت و أي مكان يبيع ريميل لندن
تاني مستحضر ..
♥Maybelline Baby Lips in Pink Punch♥
هادا شيء مره جمييييل و طبيعي و مره حلو :"(
مرطب ملون .. أبداً مهو روج !
أي بنت ما تحب الأرواج لازم لازم تجربه ..
فيه حماية من الشمس كمان !
السعر : 15 ريال
موجود في بوتس و سيتي ماكس و سنتر بوينت !
♥آخر شيء : الحواجب :Eye Brows ♥
أوكي أنا ما أنكر إن الحواجب مهمة .. بالذات في بعض البنات يحتاجو الخطوة دي لأن حواجبهم جداً خفيييفة ..
بس بنات الجامعة يرسمو حواجبهم بالكــــحـــــــل !!
و هادا أكبر غلط في تاريخ المكياج ، افضل طريقة لرسم الحواجب بطريقة طبيعية هي ال powder !
آي شدو مات بني غامق .. أو زي المنتج دا ..
♥ E.L.F Eyebrow Studio Kit ♥
فيه جهتين ، جهة البودرة .. و جهة شمع مثبت ..
ما أعرف ليه ما حبيت الشمع .. يمكن ما عرفت استخدمه ..
المهم البودرة في الرسم شيء مره حلو و طبيعي و سهلة في الرسم !
أستخدم معاها فرشة ماك المشطوفة 266 ..
السعر : 18 ريال سعودي
مافي عندنا ، أمازون أمريكا .. أو لو تبغو زيها في من Benefit في سيفورا نفسها بس فرق السعر يشيب الراس ..
بينيفت سعرها 170+ اسمها Browzings
بس نفسها ما تفرق بس علبتها أحلى هههههههههه
♥
-----------------------------------------
Thank you so much for reading , i hope you enjoyed ..
كده أكون خلصت من هادي التدوينة و أتمنى تكون عجبتكم و أفادتكم يارب ..
إذا تبغوني أدخل في التفاصيل في منتجات محددة أكتبولي و أنا راح اسوي ريفيو ان شاء الله ..
شكراً لكم ..♥♥♥
مممرا جميل يعطيكك العافية حبيبي وانعجبت من فرق الاسعار ب موقع امازون بالمنتجات اللي عندنا تسلمين
ردحذف